ಈರುಳ್ಳಿ ಆಲೂಗೆಡ್ಡೆ ಪಲ್ಯ :-)

ಇವತ್ತಿಗೆ ಪಲ್ಯ ಖಾಲಿಯಾಯಿತು. ಮತ್ತೆ ತಯಾರಿಸಿದರೆ ಹೆಚ್ಚಾಗುತ್ತದೆ. ಆದ್ದರಿಂದ ಅಡುಗೆ ಮನೆಯಲ್ಲಿ ತಯಾರಿಸುವ ಬದಲು ನನ್ನ ಬ್ಲಾಗ್ ಪುಟದಲ್ಲಿ ತಯಾರಿಸುತ್ತಿದ್ದೇನೆ. ಕಂಪ್ಯೂಟರ್ನಲ್ಲಿ ಪಲ್ಯ ತಯಾರಿಸುವಾಗ ಸ್ಟೊವ್ ಎಂದು ತಿಳಿ ಅದಕ್ಕೆ ಬೆಂಕಿ ಹಚ್ಚುವ ಸಾಹಸಕ್ಕೆ ಇಳಿಯಬೇಡಿ.

ಬಹಳ ವರ್ಷಗಳ ಹಿಂದೆ, ಮಸಾಲೆ ದೋಸೆ ತಿನ್ನಲು ಹೋಟೆಲನ್ನು ಅವಲಂಭಿಸುತ್ತಿದ್ದೆ. ಏಕೆಂದರೆ ಆಲೂಗೆಡ್ಡೆ ಪಲ್ಯ ತಯಾರಿಸಲು ಬರುತ್ತಿರಲಿಲ್ಲ. ಒಂದು ಶುಭದಿನದಂದು "ಅಷ್ಟು ಸುಲಭದ ಪಲ್ಯ ಕಲಿಯಲು ನಿನಗೇನು ದಾಡಿ" ಅಂತ ಅಮ್ಮ ಜೋರು ಮಾಡಿದರು. ಇದಕ್ಕೆ ಅಪ್ಪನ ಸಪೋರ್ಟ್ ಬೇರೆ :-(. ಕಡೆಗೆ ಊರಿಗೆ ಹೋದಾಗ ಅಮ್ಮ ತಯಾರಿಸಲು ಹೇಳಿ ಕೊಟ್ಟರು. ಅರೆ ತುಂಬಾ ಸುಲಭ :-). ಆಲೂಗೆಡ್ಡೆ ಬೇಯಿಸುವುದು ಮಾತ್ರ ಸ್ವಲ್ಪ ಸಮಯದ ಕೆಲಸ [ಜೊತೆಗೆ ಕುಕ್ಕರ್ ತೊಳೆಯುವುದು :-(]. ಆದರೂ ತಿನ್ನುವಾಗ ತುಂಬಾ ಮಜ ಬರುತ್ತದೆ. ಸುಮಾರು ೩ ವರುಷದಿಂದ ನಾನೆ ಮಸಾಲೆ ದೋಸೆ ಆಸೆಯಾದಾಗ ತಯಾರಿಸುತ್ತೇನೆ :-). ದೋಸೆ ತಯಾರಿಸುವ ವಿಧಾನವನ್ನು ಸಮಯ ಸಿಕ್ಕಾಗ ಬರೆಯುತ್ತೇನೆ. ಪಲ್ಯ ತಯಾರಿಸಲು ಅಮ್ಮ ಹೇಳಿಕೊಟ್ಟ ರೆಸಿಪಿ ಇಲ್ಲಿದೆ (೩ ಮಂದಿಗೆ ಸಾಕಾಗಬಹುದು)

ಬೇಕಾಗುವ ಸಾಮಾಗ್ರಿಗಳು:

೧) ಈರುಳ್ಳಿ (ಸುಮಾರು ೩)
೨) ಆಲೂಗೆಡ್ಡೆ (ಸುಮಾರು ೫ ಸಾಧಾರಣ ಗಾತ್ರದ್ದು)
೩) ಶುಂಠಿ (ಸಣ್ಣ ತುಂಡು)
೪) ಒಗ್ಗರಣೆ ಸಾಮಾನುಗಳು (ಹಸಿಮೆಣಸು, ಘಾಟಿ ಮೆಣಸು, ಸಾಸಿವೆ, ಕಡಲೆ ಬೇಳೆ, ಕರಿಬೇವು ಸೊಪ್ಪು)
೫) ಚಿಟಿಕೆ ಅರಿಶಿನಪುಡಿ
೬) ನಿಂಬೆಹಣ್ಣು - ೧

ತಯಾರಿಸುವ ವಿಧಾನ:

ಆಲೂಗೆಡ್ಡೆಯನ್ನು ಮೊದಲೇ ತುಂಡರಿಸಿ ಬೇಯಿಸಿಡಿ. ಆಲೂಗೆಡ್ಡೆ ಬೇಯಲು ಕುಕ್ಕರಿನಲ್ಲಿ ೩ ವಿಶಲ್ ಸಾಕಾಗುತ್ತದೆ. ಹಾಗೆ ಈರುಳ್ಳಿಯನ್ನು ತುಂಡರಿಸಿಡಿ.

ಮೊದಲು ಬಾಣಲೆಯಲ್ಲಿ ಎಣ್ಣೆ ಅಥವಾ ತುಪ್ಪವನ್ನು ಸುರಿಯಿರಿ. ನಂತರ ಅದಕ್ಕೆ ಹಂತಹಂತವಾಗಿ ಸಾಸಿವೆ, ಕಡಲೆಬೇಳೆ, ಹಸಿಮೆಣಸು, ಘಾಟಿ ಮೆಣಸು ಮತ್ತು ಕರಿಬೇವು ಸೊಪ್ಪನ್ನು ಸೇರಿಸಿ ಚೆನ್ನಾಗಿ ಕರಿಯಿರಿ. ಮಿಶ್ರಣ ಕಪ್ಪಾಗದಂತೆ ನೋಡಿಕೊಳ್ಳಿ. ನಂತರ ಅದಕ್ಕೆ ತುಂಡರಿಸಿದ ಈರುಳ್ಳಿ ಯನ್ನು ಸೇರಿಸಿ ಮಿಶ್ರಣವನ್ನು ಹದವಾಗಿ ಕರಿಯಿರಿ. ಈರುಳ್ಳಿಯ ಬಣ್ಣ ಸ್ವಲ್ಪ ಬದಲಾದ ನಂತರ ಅದಕ್ಕೆ ನೀರನ್ನು ಸೇರಿಸಿ. ಹೆಚ್ಚು ನೀರನ್ನು ಸೇರಿಸಿದರೆ ಪಲ್ಯ ಮೆತ್ತಗಾಗುತ್ತದೆ. ಬೇಕಾದಷ್ಟೆ ಸೇರಿಸಿ. ಇದೇ ಮಿಶ್ರಣಕ್ಕೆ ಸ್ವಲ್ಪ ಅರಿಶಿನ ಜೊತೆಗೆ ಬೇಕಾಗುವಷ್ಟು ಉಪ್ಪನ್ನು ಸೇರಿಸಿ.  ೧೦ ನಿಮಿಷ ಈರುಳ್ಳಿ ಬೆಂದ ನಂತರ ಅದಕ್ಕೆ ಬೇಯಿಸಿದ ಆಲೂಗೆಡ್ಡೆಯನ್ನು ಸೇರಿಸಿ. ಆಲೂಗೆಡ್ಡೆಯನ್ನು ಹಿಚುಕಿ ನಂತರ ಬಾಣಲಿಗೆ ಸೇರಿಸಿ ಮಿಶ್ರಣವನ್ನು ಚೆನ್ನಾಗಿ ಕಲಸಿ. ಸ್ವಲ್ಪ ಹೊತ್ತು ಸಿಮ್ಮಿನಲ್ಲಿ ಬೇಯಿಸಿ ನಂತರ ಅದಕ್ಕೆ ನಿಂಬೆಹಣ್ಣನ್ನು ಹಿಂಡಿದರೆ ರುಚಿಕರವಾದ ಪಲ್ಯ ತಯಾರು. ಇದನ್ನು ದೋಸೆ ಅಥವಾ ಚಪಾತಿ ಜೊತೆಗೆ ಕೂಡ ತಿನ್ನಬಹುದು.

ಕೊನೆ ಹನಿ:

೧) ಶುಂಠಿ ಆಪ್ಶನಲ್ ಆದರೂ ಬಹಳ ಇಂಪಾರ್ಟೆಂಟ್. ಇದು ಆಲೂಗೆಡ್ಡೆಯ ಅಡ್ಡ ಪರಿಣಾಮವನ್ನು ತಡೆಯುತ್ತದೆ ;-)
೨) ದೊಡ್ಡಕ್ಕ ತುಂಬಾ ಚೆನ್ನಾಗಿ ತಯಾರಿಸುತ್ತಾರೆ. ನಾನು ತಯಾರಿಸುವ ಪಲ್ಯದ ರುಚಿ ಇನ್ನು ಅವರ ಮಟ್ಟಕ್ಕೆ ತಲುಪಿಲ್ಲ.
೩) ಹಾಗೆ ಒಗ್ಗರಣೆಗೆ ಶೇಂಗಾ ಕೂಡ ಸೇರಿಸಬಹುದು ಆದರೆ ಆಲೂಗೆಡ್ಡೆ ಜೊತೆಗೆ ಸೇರಿ ಅಡ್ಡ ಪರಿಣಾಮದ ಜುಗಲ್-ಬಂದಿ ಆಗುತ್ತದೆ :-)
೪) ಈರುಳ್ಳಿ ತುಂಡರಿಸುವಾಗ ದಳದಳ ಅಂತ ಕಣ್ಣೀರು ಸುರಿದರೆ ಅಣ್ಣಾವ್ರು ಹೇಳಿದ "ಕಣ್ಣೀರಧಾರೆ ಇದೇಕೆ" ಹಾಡನ್ನು ಕೇಳಿ ಅಥವಾ ನೀವೆ ಹಾಡಿ ;-) [ಶುಭಪಂತುವರಾಳಿ ರಾಗದಲ್ಲಿರುವ ಹಾಡನ್ನು ಇಲ್ಲಿ ಕೇಳಿ ಅಣ್ಣಾವ್ರ ಕ್ಷಮೆ ಕೇಳುತ್ತಾ]. ಇಲ್ಲದಿದ್ದರೆ ಕೆಳಗೆ ಬರೆದಿರುವ ನನ್ನ ರಿಮೇಕ್ ಕೂಡ ಹಾಡಬಹುದು ;-)
"ಕಣ್ಣೀರಧಾರೆ ಇದೇಕೆ ಇದೇಕೆ
ಪಲ್ಯದ ಈರುಳ್ಳಿಯೆ ಈ ಪರಿಯ ಕೋಪವೇಕೆ"
೫) ದೋಸೆಗೆ ಚಟ್ನಿ ತಯಾರಿಸುವ ವಿಧಾನವನ್ನು ಇಲ್ಲಿ ಬರೆದಿದ್ದೇನೆ.

ಹಾಗೆಯೇ ಈ ತಿಂಗಳ ೨ ನೇ ವಾರದಂದು ನನ್ನ ಬ್ಲಾಗ್ ೪ನೇ ವರುಷಕ್ಕೆ ಕಾಲಿಟ್ಟಿದೆ. ತುಂಬಾ ಸಂತೊಷವಾಗುತ್ತದೆ ಅಷ್ಟು ವರುಷದಿಂದ ಬರೆಯುತ್ತೇನೆಂಬುದನ್ನು ತಿಳಿದು. ೧೦೦ ಕ್ಕು ಹೆಚ್ಚು ಬ್ಲಾಗ್ ಲೇಖನಗಳನ್ನು ಬರೆದಿದ್ದೇನೆ. ಬಹಳಷ್ಟು ಮಂದಿ ಪ್ರಶಂಸಿಸಿದ್ದಾರೆ ಹಾಗೆ ಕೆಲವರು ತಿದ್ದಿದ್ದಾರೆ ಕೂಡ.  ಹಾಗೆ ಬರೆಯಲು ಇನ್ನು ಬಹಳಷ್ಟು ಬಾಕಿ ಇದೆ. ಆದರೆ ಸಮಯದ ಅಭಾವದಿಂದ ಬರೆಯಲು ಸಾಧ್ಯವಾಗುತ್ತಿಲ್ಲ. ಇನ್ನೆರಡು ವಾರ ಏನೂ ಬರೆಯಲು ಸಾಧ್ಯವಿಲ್ಲವೇನೋ. ೪ವರ್ಷದ ನನ್ನ ಅನುಭವಗಳನ್ನು. ಪ್ರತ್ಯೇಕ ಪುಟದಲ್ಲಿ ಗೀಚುತ್ತೇನೆ. ಸಂತೋಷದ ವಿಷಯವೆಂದರೆ ನನ್ನ ಬ್ಲಾಗ್ ವೀಕ್ಷಕರಲ್ಲಿ ಸುಮಾರು ೯೫% ಮಂದಿ ಗೂಗಲ್ ಸರ್ಚ್ ನಿಂದ ಬಂದವರು. ಇದರಿಂದ ನನ್ನ ಬ್ಲಾಗ್ ಪುಟಕ್ಕೆ ವೀಕ್ಷಕರ ಕೊರತೆ ಇರುವುದಿಲ್ಲ ಕೂಡ :-). ಈ ದಿನದಂದು ನನ್ನ ಎಲ್ಲಾ ಒದುಗರಿಗೆ ಧನ್ಯವಾದಗಳನ್ನು ಅರ್ಪಿಸುತ್ತೇನೆ.

ತೆಂಗಿನಕಾಯಿ ಚಟ್ನಿ

ದೋಸೆ ಜೊತೆಗೆ ಚಟ್ನಿ ಇಲ್ಲದಿದ್ದರೆ ಏನೋ ಮಿಸ್ ಆದಂತೆ ಅಲ್ವೆ ;-). ನನಗೂ ಕೂಡ ಹಾಗೆ. ದೋಸೆ ಜೊತೆಗೆ ಎಷ್ಟೇ ಕಷ್ಟವಾದರೂ ಚಟ್ನಿ ಬೇಕೆ ಬೇಕು. ಅದಕ್ಕೆ ತಂದೆ ತಿಂಡಿಪೋತ ಅಂತ ಕರೆಯುವುದೂ ಉಂಟು ;-). ಹಾಗೆಯೇ ತಯಾರಿಸುವುದು ಕೂಡ ಬಹಳ ಸುಲಭ. ನಾನು ತಯಾರಿಸುವ ವಿಧಾನವನ್ನು ಇಲ್ಲಿ ಬರೆದಿದ್ದೇನೆ (ಅಮ್ಮ ಹೇಳಿಕೊಟ್ಟಿದ್ದು)

ಬೇಕಾಗುವ ಸಾಮಾಗ್ರಿಗಳು:

೧) ತೆಂಗಿನಕಾಯಿ ತುರಿ (ಅರ್ಧ ತೆಂಗಿನಕಾಯಿಯದ್ದು)
೨) ಸ್ವಲ್ಪ ಹುರಿಗಡಲೆ
೩) ಹಸಿ ಮೆಣಸಿನಕಾಯಿ
೪) ಸ್ವಲ್ಪ ಹಿಂಗು
೫) ನೆನೆಸಿದ ಹುಣಸೆಹಣ್ಣು
೫) ಒಗ್ಗರಣೆ ಸಾಮಾಗ್ರಿಗಳು: ಸಾಸಿವೆ, ಉದ್ದಿನಬೇಳೆ, ಕರಿಬೇವು ಸೊಪ್ಪು, ಬ್ಯಾಡಗಿ ಮೆಣಸು.

ತೆಂಗಿನಕಾಯಿ ಚಟ್ನಿ

ತಯಾರಿಸುವ ವಿಧಾನ:

ಮೊದಲು ತುರಿದ ತೆಂಗಿನಕಾಯಿಯನ್ನು ಮಿಕ್ಸಿ ಜಾರಿನಲ್ಲಿ ಸುರಿಯಿರಿ. ನಂತರ ಅದಕ್ಕೆ ಹುರಿಗಡಲೆ, ನೆನೆಸಿದ ಹುಣಸೆಹಣ್ಣು, ಹಸಿ ಮೆಣಸು, ಹಿಂಗು ಮತ್ತು ಬೇಕಾಗುವಷ್ಟು ಉಪ್ಪನ್ನು ಸೇರಿಸಿ. ಈ ಮಿಶ್ರಣಕ್ಕೆ ಹದವಾಗಿ ನೀರನ್ನು ಸೇರಿಸಿ, ಮಿಕ್ಸಿಯಲ್ಲಿ ರುಬ್ಬಿ. ಮೊದಲು ನೀರನ್ನು ಕಡಿಮೆ ಸೇರಿಸಿ ನಂತರ ಬೇಕಾಗುವಷ್ಟು ಸೇರಿಸಿ ಮಿಶ್ರಣ ಸಣ್ಣಗಾಗುವವರೆಗೆ ರುಬ್ಬಿ. ರುಬ್ಬಿದ ನಂತರ, ಮಿಶ್ರಣವನ್ನು ಸಣ್ಣ ಪಾತ್ರೆಗೆ ಸುರಿಯಿರಿ. ಇದಾದ ಬಳಿಕ ಸಾಸಿವೆ, ಉದ್ದಿನಬೇಳೆ, ಕರಿಬೇವು ಸೊಪ್ಪು ಮತ್ತು ಬ್ಯಾಡಗಿ ಮೆಣಸಿನ ಒಗ್ಗರಣೆ ತಯಾರಿಸಿ. ಒಗ್ಗರಣೆಯನ್ನು ಮಿಶ್ರಣಕ್ಕೆ ಸೇರಿಸಿದ ನಂತರ ಆಹಾ ರುಚಿಯಾದ ಚಟ್ನಿ ತಯಾರು. ಚಟ್ನಿಯನ್ನು ದೋಸೆಯೊಂದಿಗೆ ತಿಂದು ಆನಂದಿಸಿ. ಹಾಗೆ ದೋಸೆ ತಿಂದ ನಂತರ ನಿದ್ದೆ ಹೋಗಬೇಡಿ ;-).

ಚಟ್ನಿಗೆ ಕೆಲವರು ಕೊತ್ತಂಬರಿ ಸೊಪ್ಪು ಸೇರಿಸಿ ಕೂಡ ರುಬ್ಬುತ್ತಾರೆ. ಇದರಿಂದ ಅದರ ರುಚಿ ಮತ್ತಷ್ಟು ವೃದ್ಧಿಸುವುದು ಕೂಡ! ಹಾಗೆ ಮಿಶ್ರಣಕ್ಕೆ ಸಣ್ಣ ತುಂಡು ಶುಂಠಿ ಕೂಡ ಸೇರಿಸಿ ರುಬ್ಬಬಹುದು. ಹುರಿಗಡಲೆ ಆಪ್ಶನಲ್. ಹೆಚ್ಚು ಸೇರಿಸಿದರೆ ಚಟ್ನಿ ಸಿಹಿಯಾಗುತ್ತದೆ :-). ಹಾಗೆ ಹೆಚ್ಚು ಖಾರ ಬೇಕೆಂದರೆ ಒಂದೆರಡು ಎಕ್ಸ್ಟ್ರಾ ಹಸಿ ಮೆಣಸನ್ನು ಸೇರಿಸಿ.

ತೆಂಗಿನಕಾಯಿ ಮಸಾಲೆ ಹುಳಿ

ಇತ್ತೀಚಿಗೆ ಬೇಳೆ ಬೇಯಿಸುವುದು ಕಷ್ಟವಾಗಿದೆ. ಏಕೆಂದರೆ ಬೆಳೆಯುವವರು ಕಡಿಮೆ ಜೊತೆಗೆ ಬೆಲೆ ಕೂಡ ಅಧಿಕ! ಕರಾವಳಿಯ ಹಲವಾರು ಮನೆಗಳಲ್ಲಿ ತೆಂಗಿನಕಾಯಿ ಮರ ಸರ್ವೇ ಸಾಮಾನ್ಯ. ಆದ್ದರಿಂದ ಹಲವು ಬಾರಿ ಇಲ್ಲಿಯವರು ತೆಂಗಿನಕಾಯಿ ಮಸಾಲೆ ಹುಳಿ ತಯಾರಿಸುತ್ತಾರೆ. ನಾನು ಕೂಡ ಊರಿಂದ ತೆಂಗಿನಕಾಯಿ ತಂದು ತಯಾರಿಸುತ್ತೇನೆ. ಇದನ್ನು ತಯಾರಿಸುವುದು ಕೂಡ ಅಷ್ಟು ಕಷ್ಟವಿಲ್ಲ. ನಾನು ತಯಾರಿಸುವ ವಿಧಾನವನ್ನು ಇಲ್ಲಿ ಬರೆದಿದ್ದೇನೆ (ಅಮ್ಮ ಹೇಳಿಕೊಟ್ಟಿದ್ದು).

ಮಸಾಲೆಗೆ ಬೇಕಾಗುವ ಸಾಮಾಗ್ರಿಗಳು:

೧) ತುರಿದ ತೆಂಗಿನಕಾಯಿ
೨) ಸ್ವಲ್ಪ ಜೀರಿಗೆ
೩) ಘಾಟಿ ಮೆಣಸು - ೪ ಸಾಕು
೪) ಕರಿಬೇವು ಸೊಪ್ಪು
೫) ನೆನೆಸಿದ ಹುಣಸೇ ಹಣ್ಣು

ಮೊದಲು ಒಂದು ಪಾತ್ರೆಯಲ್ಲಿ ನಿಮಗಿಷ್ಟವಾದ ತರಕಾರಿಯನ್ನು (ತುಂಡುಮಾಡಿದ) ನೀರಿನ ಜೊತೆಗೆ ಸೇರಿಸಿ. ಅದಕ್ಕೆ ಬೇಕಾಗುವಷ್ಟು ಉಪ್ಪು ಮತ್ತು ಚಿಟಿಕೆ ಅರಿಶಿನ ಸೇರಿಸಿ ಬೇಯಿಸಲು ಇಡಿ. ಪಕ್ಕದಲ್ಲಿ ಮಸಾಲೆಗೆ ತಯಾರಿ ನಡೆಸಿ. ಮೊದಲು ತುರಿದ ತೆಂಗಿನಕಾಯಿಗೆ ಸ್ವಲ್ಪ ಜೀರಿಗೆ ಮತ್ತು ಘಾಟಿ ಮೆಣಸು ತುಂಡರಿಸಿ ಸೇರಿಸಿ ಮಿಕ್ಸಿಯಲ್ಲಿ ಚೆನ್ನಾಗಿ ರುಬ್ಬಿ. ನಂತರ ಮಿಶ್ರಣಕ್ಕೆ ನೆನೆಸಿದ ಹುಣಸೆ ಹಣ್ಣು ಮತ್ತು ಕರಿಬೇವು ಎಲೆಗಳನ್ನು ಸೇರಿಸಿ, ಮಿಶ್ರಣ ಸಣ್ಣವಾಗುವವರೆಗೆ ರುಬ್ಬಿ. ಇಷ್ಟಾದ ಬಳಿಕ ಹುಳಿಯ ಮಸಾಲೆ ರೆಡಿ. ಅತ್ತ ತರಕಾರಿ ಬೆಂದಿದ್ದರೆ ಅದಕ್ಕೆ ಮಸಾಲೆಯನ್ನು ಸೇರಿಸಿ ಹುಳಿ ಕುದಿಯುವವರೆಗೆ ಇಡಿ. ಇದಕ್ಕೆ ಬೇಕಾದಲ್ಲಿ ಸ್ವಲ್ಪ ಬೇಳೆ ಕೂಡ ಸೇರಿಸಬಹುದು ಕೂಡ ;-). ಇಷ್ಟಾದ ನಂತರ ರುಚಿಯಾದ ತೆಂಗಿನಕಾಯಿ ಮಸಾಲೆ ಹುಳಿ ತಯಾರು :-). ನಂತರ ಅನ್ನಕ್ಕೆ ಕಲಸಿ ಉಂಡು ಆನಂದಿಸಿ! ಇಷ್ಟೇ ಅಲ್ಲದೆ ಇಡ್ಲಿ, ಗೋಧಿ ಹಿಟ್ಟಿನ ದೋಸೆ, ನೀರು ದೋಸೆಗೂ ಈ ಹುಳಿ ಒಗ್ಗುತ್ತದೆ.

ತೆಂಗಿನಕಾಯಿ ಮಸಾಲೆ

ಪಾಲಾಕ್ ಹುಳಿ

ಹುಳಿಯನ್ನು ಒಂದೆರಡು ದಿನ ಇಡಬಹುದು. ಹೆಚ್ಚು ದಿನ ಇಟ್ಟರೆ ತೆಂಗಿನಕಾಯಿಯ ವಾಸನೆ ಹಬ್ಬುತ್ತದೆ. ಈ ಮಸಾಲೆ ಸೌತೆಕಾಯಿ, ಕುಂಬಳಕಾಯಿ, ಬೀನ್ಸ್, ಅಲಸಂಡೆಕಾಯಿ, ಪಾಲಾಕ್ ಸೊಪ್ಪು, ಬಿಟ್ರೂಟ್, ಹೀರೆಕಾಯಿ, ನವಿಲುಕೋಸು, ಹೂಕೋಸು  ಮುಂತಾದ ತರಕಾರಿಗಳಿಗೆ ಒಗ್ಗುತ್ತದೆ. ಬೆಂಡೆಕಾಯಿ , ಬದನೇಕಾಯಿ, ಮೆಂತೆಸೊಪ್ಪು ಮುಂತಾದುವುಗಳಿಗೆ ಸರಿಯಾಗುವುದಿಲ್ಲ.

ಹೊಸ ಬಗೆಯ ಚಹಾ

ಅರೆರೆ ಏನಿದು ಹೊಸ ಬಗೆ ಅಂತಾ. ಎಂತದು ಇಲ್ಲ ಮಾರಾಯ್ರೇ, ಅಮ್ಮ ಹೇಳಿ ಕೊಟ್ಟ ಹೊಸ ವಿಧಾನದ ಚಹಾ ರೂಡಿ ಮಾಡಿಕೊಂಡಿದ್ದೇನೆ ಅಷ್ಟೇ. ಎಲ್ಲರೂ ಮಾಡುವುದು ಸಹ ಇದೇ ರೀತಿಯಲ್ಲಿ ಆದರೆ ಮೊದಲು ನಾನು ಬೇರೆ ತರಹ ತಯಾರಿಸುತ್ತಿದ್ದೆ. ಈಗ ಅಪ್ಡೇಟ್ ಆಗಿದ್ದೇನೆ :-).

ನನ್ನ ಹಳೆಯ ವಿಧಾನ ಹಾಲಿಗೆ ನೀರು ಬೆರೆಸಿ ನಂತರ ಚಹಾಪುಡಿ ಸೇರಿಸಿ ಕುದಿಸುತ್ತಿದ್ದೆ. ಇದರಿಂದ ಹಾಲಿನ ಖರ್ಚು ಕೂಡ ಹೆಚ್ಚು ಜೊತೆಗೆ ಚಹಾ ಪುಡಿ ಕೂಡ ಅಧಿಕ ವೆಚ್ಚವಾಗುತ್ತಿತ್ತು. ಇತ್ತೀಚಿಗೆ ಅಮ್ಮ ಬೆಂಗಳೂರಿಗೆ ಬಂದಾಗ ನನ್ನ ಫರ್ಮ್ವೇರ್ ಅನ್ನು ಬದಲಾಯಿಸಿ ಹೊಸ ರೀತಿಯಲ್ಲಿ ತಯಾರಿಸುವಂತೆ ತಿಳಿ ಹೇಳಿದರು. ತದನಂತರ ನಾನು ಚಹಾ ತಯಾರಿಸುವ ವಿಧಾನದಲ್ಲಿ ಫುಲ್ ಚೇಂಜ್ ;-).  ಮೊದಲು ಚಹಾ ಪಾತ್ರೆಯಲ್ಲಿ ನೀರಿನ ಜೊತೆ ಚಹಾ ಪುಡಿ ಸೇರಿಸಿ ನಂತರ ಚೆನ್ನಾಗಿ ಕುದಿಸಿ. ಡಿಕಾಕ್ಷನ್ ನಿಮಗೆ ಬೇಗಾವುವಷ್ಟು ಖಡಕ್ ಮಾಡಿಕೊಳ್ಳಿ. ತದನಂತರ ಅದಕ್ಕೆ ಒಂದು ಲೋಟೆ ಹಾಲನ್ನು ಸೇರಿಸಿ ಜೊತೆಗೆ ಬೇಕಾಗುವಷ್ಟು ಸಕ್ಕರೆ ಸೇರಿಸಿ ಮತ್ತೊಮ್ಮೆ ಕುದಿಸಿ. ಸ್ವಲ್ಪ ಹೊತ್ತಿನಲ್ಲಿ ಬಿಸಿಯಾದ ರುಚಿಯಾದ ಚಹಾ ತಯಾರು :-). ಈ ವಿಧಾನದಿಂದ ಚಹಾ ಪುಡಿ ಮತ್ತು ಹಾಲಿನ ಖರ್ಚು ಕೂಡ ಕಡಿಮೆ. ಚಹಾದೊಂದಿಗೆ ಒಂದೆರಡು ಚಕ್ಕುಲಿ ಜೊತೆಗೆ ಮಳೆ ಸುರಿಯುತ್ತಿದ್ದರೆ ಅದರ ಅನುಭವವೇ ಬೇರೆ :-).  ಸಧ್ಯಕ್ಕೆ  ಫೋಟೋದಲ್ಲಿನ ಚಹಾ ಸವಿದು ಸಂತೃಪ್ತಿ ಪಡಿ ;-).  ಚಕ್ಕುಲಿ ಅಮ್ಮ ತಯಾರಿಸಿದ್ದು, ಮಳೆ ಮಾತ್ರ ಇರಲಿಲ್ಲ :-).

ಚಹಾ

ಸೂಚನೆ: ಹೆಚ್ಚು ಚಹಾ ಕುಡಿದು ನಿದ್ರೆ ಬಾರದಿದ್ದರೆ ಅದಕ್ಕೆ ಲೇಖಕರು ಜವಾಬ್ದಾರರಲ್ಲ ;-)

ಕೊನೆ ಹನಿ: ಸಕ್ಕರೆ ಡಬ್ಬಿ ಪಕ್ಕದಲ್ಲೇ ಇಟ್ಟುಕೊಳ್ಳಿ ಕೆಲವೊಮ್ಮೆ ಸೇರಿಸಲು ಮರೆತುಹೋಗುತ್ತದೆ. ಇಷ್ಟೆಲ್ಲ ತಯಾರಿಸಿದ ನಂತರ ನಾನು ಬಹಳಷ್ಟು ಸಲ ಶುಗರ್ ಲೆಸ್ ಚಹಾ ಕುಡಿದಿದ್ದು ಉಂಟು :-(. ಹಾಗೆ ಸಕ್ಕರೆ ಡಬ್ಬಿ ಪೂರ್ತಿ ಸುರಿಯಬೇಡಿ ;-).

ಎಳಮುರಿ ಸೊಪ್ಪು ತಂಬೂಳಿ

ಒಂದೆಲಗ ತಂಬೂಳಿಯ ನಂತರ ನನ್ನ ಅಚ್ಚು ಮೆಚ್ಚಿನ ತಂಬೂಳಿ ಎಳಮುರಿ ಸೊಪ್ಪು ತಂಬೂಳಿ. ಬಹಳ ಕೂಲ್ ತಂಬೂಳಿ ಇದು. ಮನೆಯಲ್ಲಿ ಕೂಡ ಬೆಳೆಯಬಹುದು. ಒಂದೆಲಗ ಗಿಡದಂತೆ ಹೆಚ್ಚು ಆರೈಕೆ ಕೂಡ ಬೇಕಿಲ್ಲ. ಕರಾವಳಿಯ ಹಲವಾರು ಮನೆಗಳಲ್ಲಿ ಈ ಗಿಡವನ್ನು ಕಾಣಬಹುದು. ಹೊಟ್ಟೆ ಉರಿ, ಬಾಯಿ ಹುಣ್ಣಿಗೆ ಶೀಘ್ರ ಪರಿಹಾರ :-). ಇದನ್ನು ಹಾಗೆಯೇ ಕುಡಿಯಬಹುದು ಅಥವಾ ಅನ್ನಕ್ಕೆ ಕಲಸಿ ತಿನ್ನಬಹುದು. ತಂಬೂಳಿ ತಯಾರಿಸುವುದು ಕೂಡ ಬಹಳ ಸುಲಭ.

ಬೇಕಾಗುವ ಸಾಮಾಗ್ರಿಗಳು:

೧) ಎಳಮುರಿ ಸೊಪ್ಪಿನ ಎಲೆಗಳು
೨) ಸ್ವಲ್ಪ ತೆಂಗಿನಕಾಯಿ ತುರಿ
೩) ಸ್ವಲ್ಪ ಜೀರಿಗೆ
೪) ಒಗ್ಗರಣೆ ಸಾಮಾಗ್ರಿಗಳು (ಸಾಸಿವೆ, ಕಡ್ಲೆ ಬೇಳೆ, ಘಾಟಿ ಮೆಣಸು, ಕರಿಬೇವು ಸೊಪ್ಪು)

ಮೊದಲು ಸೊಪ್ಪಿನ ಎಲೆಗಳನ್ನು ಬಿಡಿಸಿ, ಅದನ್ನು ತುಪ್ಪದೊಂದಿಗೆ ಬಾಣಲಿಯಲ್ಲಿ ಕರಿಯಿರಿ. ಸ್ವಲ್ಪ ಕಪ್ಪಾಗುವವರೆಗೆ ಕರಿಯಿರಿ. ಹೆಚ್ಚು ಕಪ್ಪಾಗಲು ಬಿಡಬೇಡಿ. ಕರಿದ ಸೊಪ್ಪಿಗೆ ಸ್ವಲ್ಪ ಜೀರಿಗೆ ಮತ್ತು ಸ್ವಲ್ಪ ತೆಂಗಿನಕಾಯಿ ತುರಿಯನ್ನು ಸೇರಿಸಿ  ಮಿಶ್ರಣ ಸಣ್ಣವಾಗುವರೆಗೆ ಮಿಕ್ಸಿಯಲ್ಲಿ ರುಬ್ಬಿ. ಹಾಗೆಯೇ ಪಕ್ಕದಲ್ಲಿ ಒಗ್ಗರಣೆಗೆ ತಯಾರಿ ನಡೆಸಿ. ಸಾಸಿವೆ, ಕಡ್ಲೆ ಬೇಳೆ, ಕರಿಬೇವು ಸೊಪ್ಪು ಮತ್ತು ಘಾಟಿ ಮೆಣಸು ಸರಿಯಾದ ಸಮಯಕ್ಕೆ ಸೇರಿಸಿ ತುಪ್ಪದಲ್ಲಿ ಕರಿಯಿರಿ. ಕೊನೆಗೆ ಒಗ್ಗರಣೆಯನ್ನು ತಂಬೂಳಿ ಮಿಶ್ರಣಕ್ಕೆ ಸೇರಿಸಿ ಅದಕ್ಕೆ ಬೇಕಾಗುವಷ್ಟು ಉಪ್ಪು ಹಾಕಿ. ಇಷ್ಟಾದಲ್ಲಿ ತಂಬೂಳಿ ಮುದ್ದೆ ತಯಾರು :-). ನಿಮಗೆ ಬೇಕಾದಷ್ಟು ಮುದ್ದೆಯನ್ನು ತೆಗೆದು ಅದಕ್ಕೆ ಮಜ್ಜಿಗೆ ಇಲ್ಲವೇ ಮೊಸರು ಸೇರಿಸಿ. ತಂಬೂಳಿಯನ್ನು ಅನ್ನಕ್ಕೆ ಕಲಸಿ ಉಂಡು ಆನಂದಿಸಿ :-).

ಮುದ್ದೆಯನ್ನು ಒಂದೆರಡು ದಿನ ತಂಪು ಪೆಟ್ಟಿಗೆಯಲ್ಲಿ ಇಡಬಹುದು. ಹೆಚ್ಚು ದಿನ ಇಟ್ಟರೆ ತೆಂಗಿನಕಾಯಿಯ ವಾಸನೆ ಹಬ್ಬುತ್ತದೆ. ಹಾಗೆ ಮಿಶ್ರಣಕ್ಕೆ ಸ್ವಲ್ಪವೇ ತೆಂಗಿನಕಾಯಿ ಸೇರಿಸಿದರೆ ಒಳ್ಳೆಯದು

ಮಜ್ಜಿಗೆ ಸೊಪ್ಪು ಚಹಾ

ಸಂಜೆ ಚಹಾ ಕುಡಿಯುವಾಗ ನೆನಪಾಗುವುದು ಅಮ್ಮ ಮಾಡಿಕೊಡುವ ಮಜ್ಜಿಗೆ ಸೊಪ್ಪು ಚಹಾ. ಕರಾವಳಿಯಲ್ಲಿ ಚಹಾಕ್ಕೆ ಫ್ಲೇವರ್ ಗಳಾಗಿ ಈ ಸೊಪ್ಪನ್ನು ಉಪಯೋಗಿಸುತ್ತಾರೆ.  ಕರಾವಳಿ/ಮಲೆನಾಡು ಭಾಗದ ತೆಂಗಿನ ಮರ ಇಲ್ಲವೇ ಬಾಳೆ ಗಿಡದ ಹಿತ್ತಲಲ್ಲಿ ಹೆಚ್ಚಾಗಿ ಬೆಳೆಯುತ್ತದೆ. ಈ ಸೊಪ್ಪಿಗೆ ಆರೈಕೆ ಕೂಡ ಅಗತ್ಯ. ಬಹಳಷ್ಟು ನೀರು ಹಾಗೂ ತಂಪಿನ ಜಾಗ ಅಗತ್ಯ. ಸೂರ್ಯನ ಕಿರಣಗಳು ಹೆಚ್ಚಾಗಿ ಬೀಳಕೂಡದು. ಮಳೆಗಾಲದಲ್ಲಿ ಸೊಂಪಾಗಿ ಬೆಳೆಯುತ್ತದೆ. ಈ ಸೊಪ್ಪನ್ನು ಶೀತವಾದವರಿಗೆ ಮಾಡುವ ಕಷಾಯದ ಅಂಶವಾಗಿ ಕೂಡ ಉಪಯೋಗಿಸುತ್ತಾರೆ. ಹಾಗೆ ಸ್ವಲ್ಪ ಹೀಟೂ ಕೂಡ ;-). ಕೀಳುವಾಗ ಸ್ವಲ್ಪ ಜಾಗ್ರತೆ ಕೂಡ ಬೇಕು. ಸೊಪ್ಪು ತೆಳ್ಳಗಾದರೂ ಬದಿಯಲ್ಲಿ ಸ್ವಲ್ಪ ಚೂಪು ಕೂಡ!

ಮಜ್ಜಿಗೆ ಸೊಪ್ಪು

ಚಹಾ ತಯಾರಿಸುವ ವಿಧಾನ:

ಮೊದಲು ನೀರಿನ ಜೊತೆ ೨ ಮಜ್ಜಿಗೆ ಸೊಪ್ಪನ್ನು ಸ್ವಲ್ಪ ಹೊತ್ತು ಬಿಸಿ ಮಾಡಿ, ಅದಕ್ಕೆ ಹಾಲು ಸೇರಿಸಿ ಚಹಾ ಮಾಡಿದರೆ ಆಹಾ!! ಬಿಸಿಬಿಸಿ ಘಮಘಮ ಚಹಾ ತಯಾರು. ಈ ಚಹಾವನ್ನು ಮಳೆ ವೀಕ್ಷಿಸುತ್ತಾ ಸವಿಯುವುದೇ ಒಂದು ಸುಂದರ ಅನುಭವ. ಮೂರು ಲೋಟೆ ಚಹಾಕ್ಕೆ ಮೂರು ಮಜ್ಜಿಗೆ ಸೊಪ್ಪು ಬಳ್ಳಿಗಳು ಸಾಕು. ಶುಂಠಿ ಚಹಾದಂತೆ ಕಂಡರೂ ಇದರ ಪರಿಮಳ ಮತ್ತು ರುಚಿ ವರ್ಣಿಸಲಾಗದು. ನಮ್ಮ ರೆಡ್ ಲೇಬಲ್ ಮಸಾಲೆ ಚಹಾದಂತೆ ಇರುತ್ತದೆ ;-).

ಹೀರೆಕಾಯಿ ಬಜ್ಜಿ

ನನ್ನ ಅಚ್ಚು ಮೆಚ್ಚಿನ ಬಜ್ಜಿ ಇದು :-). ಇದನ್ನು ಅನ್ನಕ್ಕೆ ಮಾತ್ರವಲ್ಲದೆ, ದೋಸೆ, ಇಡ್ಲಿ ಮತ್ತು ಚಪಾತಿ ಜೊತೆ ಕೂಡ ಬಳಸಬಹುದು. ಇದನ್ನು ತಯಾರಿಸುವುದಕ್ಕೆ ಸ್ವಲ್ಪ ಸಮಯ ಬೇಕಾಗುತ್ತದೆ. ನಾನು ಮಾಡುವ ವಿಧಾನವನ್ನು ಇಲ್ಲಿ ಬರೆದಿದ್ದೇನೆ [ಅಮ್ಮ ಹೇಳಿಕೊಟ್ಟಿದ್ದು :-)].

ಬೇಕಾಗುವ ಸಾಮಾಗ್ರಿಗಳು:

೧) ಹೀರೆಕಾಯಿ - ೧ ಸಾಕು
೨) ತುರಿದ ತೆಂಗಿನಕಾಯಿ (ಬೇಕಾಗುವಷ್ಟು), ಒಣ ಹುಣಸೆ ಹಣ್ಣು, ಸಣ್ಣ ಬೆಲ್ಲದ ತುಂಡು, ಚಿಟಿಕೆ ಅರಶಿನ ಪುಡಿ
೩) ಒಗ್ಗರಣೆ ಸಾಮಾನುಗಳು (ಘಾಟಿ ಮೆಣಸು, ಕೊತ್ತಂಬರಿ, ಉದ್ದಿನ ಬೇಳೆ)
೪) ತೆಂಗಿನೆಣ್ಣೆ
೫) ೧ ಹಸಿಮೆಣಸು, ಸ್ವಲ್ಪ ಕರಿಬೇವು ಸೊಪ್ಪು

ಮೊದಲು ಪಾತ್ರೆಯಲ್ಲಿ ಹೀರೆಕಾಯಿಯನ್ನು ಸಣ್ಣಗೆ ತುಂಡರಿಸಿ ಇಡಿ(ತುಂಬಾ ಸಣ್ಣಗೆ ಅಲ್ಲ!). ಅದನ್ನು ತೊಳೆದು ನಂತರ ಬೇಕಾಗುವಷ್ಟು ನೀರು ಸೇರಿಸಿ. ನಂತರ ಅದಕ್ಕೆ ಹುಣಸೆ ಹಣ್ಣು, ಅರಿಶಿನ, ಬೆಲ್ಲ ಸೇರಿಸಿ, ಹೀರೆಕಾಯಿಯ ಮಿಶ್ರಣವನ್ನು ಬೇಯಿಸಿ. ಹೀರೆಕಾಯಿ ಮೆದುವಾಗುವವರೆಗೂ ಬೇಯಿಸಬೇಕು (ಸುಮಾರು ೧೫ ನಿಮಿಷ ತಗುಲಬಹುದು). ಬೇಯುತ್ತಿರುವಾಗಲೇ, ಪಕ್ಕದಲ್ಲಿ ಒಗ್ಗರಣೆಗೆ ತಯಾರಿ ನಡೆಸಿ. ಒಗ್ಗರಣೆ ಪಾತ್ರೆಯಲ್ಲಿ ಸುಮಾರು ೨ ಚಮಚ ತೆಂಗಿನೆಣ್ಣೆ ಸುರಿಯಿರಿ ನಂತರ ಅದಕ್ಕೆ ಮೇಲೆ ಬರೆದಂತೆ ಸಾಮಗ್ರಿಗಳನ್ನು ಸೇರಿಸಿ. ಉದ್ದಿನ ಬೇಳೆ ಕೆಂಪಾಗುವವರೆಗು ಕರಿಯಿರಿ.

ಹೀರೆಕಾಯಿ ಬೆಂದ ನಂತರ ಮಿಶ್ರಣವನ್ನು ಆರಲು ಬಿಡಿ. ತಣ್ಣಗಾದ ನಂತರ ಮಿಕ್ಸಿಯಲ್ಲಿ ತುರಿದ ತೆಂಗಿನಕಾಯಿ, ಬೇಯಿಸಿದ ಹೀರೆಕಾಯಿ, ಬೇಕಾಗುವಷ್ಟು ಉಪ್ಪು ಮತ್ತು ಒಗ್ಗರಣೆಯನ್ನು ಸೇರಿಸಿ ಚೆನ್ನಾಗಿ ರುಬ್ಬಿ. ನಂತರ ಅದಕ್ಕೆ ಹಸಿ ಮೆಣಸು ಮತ್ತು ಕರಿಬೇವು ಸೊಪ್ಪು ಸೇರಿಸಿ ಮಿಶ್ರಣ ಸಣ್ಣಗಾಗುವವರೆಗೆ ರುಬ್ಬಿ. ಇಷ್ಟಾದ ನಂತರ ರುಚಿಯಾದ ಬಜ್ಜಿ ತಯಾರು :). ಇದನ್ನು ಅನ್ನಕ್ಕೆ ಕಲಸಿ ತಿನ್ನಿ (ಸ್ವಲ್ಪ ತೆಂಗಿನೆಣ್ಣೆ ಜೊತೆ). ಇಲ್ಲವಾದಲ್ಲಿ ಮೊಸರನ್ನದೊಂದಿಗೆ ಕೂಡ ಬಳಸಬಹುದು.

ಕೆಲವು ಗಮನದಲ್ಲಿಡಬೇಕಾದ ಅಂಶಗಳು

೧) ಹೀರೆಕಾಯಿ ಬೇಯಿಸುವಾಗ ಬೇಕಾದಷ್ಟೇ ನೀರು ಸೇರಿಸಿ. ಇಲ್ಲವಾದಲ್ಲಿ ಬಜ್ಜಿ ತುಂಬಾ ನೀರಾಗುವುದು.
೨) ಹೀರೆಕಾಯಿ ಬೇಯಿಸಿದ ನಂತರ ನೀರನ್ನು ಚೆಲ್ಲಬೇಡಿ. ಅದೇ ನೀರನ್ನು ಬಜ್ಜಿ ತಯಾರಿಸುವುದಕ್ಕೆ ಉಪಯೋಗಿಸಬೇಕು.
೩) ಸಣ್ಣ ತುಂಡಿನ ಬೆಲ್ಲವನ್ನು ಹಾಕಿ. ಇಲ್ಲವಾದಲ್ಲಿ ಬಜ್ಜಿ ಸಿಹಿಯಾಗಿಬಿಡುತ್ತದೆ! ಹಾಗೆ ಹಸಿ ಮೆಣಸು ಕೂಡ ಸಣ್ಣ ಪ್ರಮಾಣದಲ್ಲಿ ಸೇರಿಸಿ.
೪) ಒಗ್ಗರಣೆ ತೆಂಗಿನ ಎಣ್ಣೆಯದ್ದು ಆದರೆ ಒಳ್ಳೆಯದು. ಅದರ ರುಚಿಯೇ ಬೇರೆ ;-)

ಮಟ್ಟು ಗುಳ್ಳ ಮೊಸರು ಬಜ್ಜಿ

ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಯ ವಿಶೇಷ ತರಕಾರಿ ಮಟ್ಟು ಗುಳ್ಳ. ಇದರ ಪಲ್ಯ ಮತ್ತು ಹುಳಿ ಎಷ್ಟು ಪ್ರಸಿದ್ಧಿಯೋ, ಅಷ್ಟೇ ರುಚಿಕರ ಈ ಮೊಸರು ಬಜ್ಜಿ. ಹಾಗಾಗಿ ಈ ವಾರದ ರುಚಿ ಮಟ್ಟು ಗುಳ್ಳ ಮೊಸರು ಬಜ್ಜಿ :-). ಇದನ್ನು ತಯಾರಿಸುವುದು ಬಹಳ ಸುಲಭ ಕೂಡ.

ಮೊಸರು ಬಜ್ಜಿ :-)

ಬೇಕಾಗುವ ಸಾಮಾಗ್ರಿಗಳು:

೧) ಮಟ್ಟು ಗುಳ್ಳ (೨)
೨) ಮೊಸರು ಬೇಕಾದಷ್ಟು
೩) ಒಗ್ಗರಣೆ ಸಾಮಾಗ್ರಿಗಳು (ಸಾಸಿವೆ, ಕಡಲೆ ಬೇಳೆ, ಕರಿಬೇವು ಸೊಪ್ಪು)
೪) ೨ ಹಸಿಮೆಣಸು
೫) ಸ್ವಲ್ಪ ಹಿಂಗು

ತಯಾರಿಸುವ ವಿಧಾನ:

ಮೊದಲು ಗುಳ್ಳವನ್ನು ತುಂಡರಿಸಿ (ಸ್ವಲ್ಪ ದೊಡ್ಡದಾಗಿ!) ೨ ಘಂಟೆ ನೀರಿನಲ್ಲಿ ನೆನೆಸಿ. ನೆನೆಸದಿದ್ದರೆ ಬಜ್ಜಿ ಕಪ್ಪಾಗುತ್ತದೆ. ಕೆಲವೊಮ್ಮೆ ಗುಳ್ಳದ ಕಹಿ ಕೂಡ ಹಾಗೆ ಉಳಿಯುತ್ತದೆ. ನೆನೆಸಿದ ನಂತರ ನೀರನ್ನು ಚೆಲ್ಲಿ, ಹೊಸ ನೀರನ್ನು ಸೇರಿಸಿ ಮಟ್ಟು ಗುಳ್ಳವನ್ನು ಬೇಯಿಸಿ. ಗುಳ್ಳ ಮೆದುವಾಗುವವರೆಗೆ ಬೇಯಿಸಿ (ಬಣ್ಣ ಬದಲಾದಾಗ ತಿಳಿಯುತ್ತದೆ). ನಂತರ ನೀರನ್ನು ಚೆಲ್ಲಿ, ಸ್ವಲ್ಪ ತಣ್ಣಗಾಗಲು ಬಿಡಿ. ಹಾಗೆ ಸಣ್ಣ ಪಾತ್ರೆಯಲ್ಲಿ ಸ್ವಲ್ಪ ಹಿಂಗಿಗೆ (ಅಂಟು ಹಿಂಗು) ನೀರು ಬೆರೆಸಿ ಬದಿಯಲ್ಲಿಡಿ. ಗುಳ್ಳ ಬೇಯಿಸಿದ ಪಾತ್ರೆಗೆ ಬೇಕಾಗುವಷ್ಟು ಮೊಸರು ಮತ್ತು ಉಪ್ಪನ್ನು ಸೇರಿಸಿ. ಹಸಿಮೆಣಸನ್ನು ಸಣ್ಣಗೆ ತುಂಡರಿಸಿ ಪಾತ್ರೆಗೆ ಸೇರಿಸಿ. ಈ ಮಿಶ್ರಣವನ್ನು ಚೆನ್ನಾಗಿ ಕೈಯಲ್ಲಿ ಹಿಚುಕಿ. ಇದಕ್ಕೆ ಹಿಂಗಿನ ನೀರನ್ನು ಸೇರಿಸಿ. ನಂತರ ಒಗ್ಗರಣೆಯನ್ನು ಸೇರಿಸಿದರೆ ರುಚಿಯಾದ ಬಜ್ಜಿ ತಯಾರು :-). ಕೆಲವರು ಇದಕ್ಕೆ ರುಬ್ಬಿದ ತೆಂಗಿನಕಾಯಿ ಮಿಶ್ರಣವನ್ನು ಸೇರಿಸುತ್ತಾರೆ. ಇದರಿಂದ ರುಚಿ ಮತ್ತಷ್ಟು ವೃದ್ಧಿಸುವುದು ಕೂಡ. ಬಜ್ಜಿ ತಯಾರಾದ ನಂತರ ಅನ್ನಕ್ಕೆ ಕಲಸಿ ಉಂಡು ಆನಂದಿಸಿ ;-).

ಚುರುಮುರಿ (Churumuri)

ಸಂಜೆ ಕಾಫಿ ಜೊತೆಗೆ ನನ್ನ ಅಚ್ಚುಮೆಚ್ಚಿನ ತಿಂಡಿ ಚುರುಮುರಿ. ಕರಾವಳಿಯ ಮಳೆಗೆ ಸರಿಯಾದ ಹೊಂದಾಣಿಕೆ. ಇದನ್ನು ತಯಾರಿಸುವುದು ಕೂಡ ಬಹಳ ಸುಲಭ. ನಾನು ತಯಾರಿಸುವ ವಿಧಾನವನ್ನು ಇಲ್ಲಿ ಬರೆದಿದ್ದೇನೆ.

ಬೇಕಾಗುವ ಸಾಮಾಗ್ರಿಗಳು:

೧) ೨ ಟೊಮ್ಯಾಟೋ (ಗಾತ್ರ ದೊಡ್ಡದಾಗಿದ್ದಾರೆ ಒಂದು ಸಾಕು)
೨) ೨ ಈರುಳ್ಳಿ
೩) ಮೆಣಸಿನ ಪುಡಿ
೪) ನಿಂಬೆಹಣ್ಣು - ಅರ್ಧಸಾಕು
೫) ತೆಂಗಿನಎಣ್ಣೆ
೬) ಸ್ವಲ್ಪ ಮಿಕ್ಶರ್
೫) ಸ್ವಲ್ಪ ತುರಿದ ಕ್ಯಾರೆಟ್
೬) ಮಂಡಕ್ಕಿ.

ತಯಾರಿಸುವ ವಿಧಾನ:

ಮೊದಲು ಟೊಮ್ಯಾಟೋ ಮತ್ತು ಈರುಳ್ಳಿಯನ್ನು ಸಣ್ಣಗೆ ತುಂಡರಿಸಬೇಕು. ಸಣ್ಣ ಪಾತ್ರೆಯಲ್ಲಿ ೪ ಚಮಚ ತೆಂಗಿನ ಎಣ್ಣೆಯನ್ನು ಸುರಿಯಿರಿ. ಅದಕ್ಕೆ ರುಚಿಗೆ ಬೇಕಾದಷ್ಟು ಉಪ್ಪು ಮತ್ತು ಮೆಣಸಿನ ಪುಡಿ ಸೇರಿಸಿ. ನಂತರ ತುಂಡರಿಸಿದ ಟೊಮ್ಯಾಟೋ, ತುರಿದ ಕ್ಯಾರೆಟ್ ಮತ್ತು ಈರುಳ್ಳಿಯನ್ನು ಸೇರಿಸಿ. ಮಿಶ್ರಣವನ್ನು ಚೆನ್ನಾಗಿ ಕಲಸಿ ನಂತರ ಅದಕ್ಕೆ ನಿಂಬೆಹಣ್ಣು ರಸ ಹಿಂಡಿ.  ಈಗ ಬೇಕಾದಷ್ಟು ಮಂಡಕ್ಕಿ ಸೇರಿಸಿ ಚೆನ್ನಾಗಿ ಕಲಸಿ. ಅದಕ್ಕೆ ಸ್ವಲ್ಪ ಮಿಕ್ಶರ್ ಸೇರಿಸಿ ಮತ್ತೆ ಕಲಸಿ. ರುಚಿಯಾದ ಚುರುಮುರಿ ತಯಾರು :-).

ತಯಾರಾದ ತಕ್ಷಣವೇ ತಿನ್ನಿ ಇಲ್ಲವಾದಲ್ಲಿ ಮಂಡಕ್ಕಿ ಮೆದುವಾಗುತ್ತದೆ. ಆದಷ್ಟು ಕೊನೆಗೆ ಮಂಡಕ್ಕಿ ಸೇರಿಸಿ. ಮೆಣಸಿನ ಪುಡಿ ಮತ್ತು ತರಕಾರಿ ನಿಮಗೆ ಬೆಕಾಗುವಷ್ಟು ಸೇರಿಸಿ. ಇಲ್ಲಿ ನಾನು ಬರೆದಿದ್ದು ಒಬ್ಬರಿಗೆ ಬೇಕಾಗುವಷ್ಟು ಮಾತ್ರ. ನಿಮ್ಮ ಬೇಡಿಕೆಗೆ ತಕ್ಕಂತೆ ಬದಲಾಯಿಸಿ. ಚುರುಮುರಿಗೆ ತುರಿದ ಮಾವಿನಕಾಯಿ ಮತ್ತು ಸೌತೆಕಾಯಿ ಕೂಡ ಸೇರಿಸಬಹುದು. ಸೌತೆಕಾಯಿಯಲ್ಲಿ ನೀರಿನ ಅಂಶ ಇರುವುದರಿಂದ ನಾನು ಹೆಚ್ಚಾಗಿ ಬಳಸುವುದಿಲ್ಲ.

ಟೋಮಾಟೊ ತಂಬೂಳಿ

ಬಹಳ ಸುಲಭವಾಗಿ ತಯಾರಿಸಬಹುದಾದ ತಂಬೂಳಿ! ಬೇಗನೆ ತಯಾರಿಸಬಹುದು ಕೂಡ.

ಬೇಕಾಗುವ ಸಾಮಾಗ್ರಿಗಳು:

೧) ಮೊಸರು : ಬೇಕಾದಷ್ಟು
೨) ಒಗ್ಗರಣೆ ಪದಾರ್ಥಗಳು: ಸಾಸಿವೆ, ಉದ್ದಿನ ಬೇಳೆ, ಬ್ಯಾಡಗಿ ಮೆಣಸು, ಕರಿಬೇವು ಸೊಪ್ಪು.
೩) ಟೋಮಾಟೊ : ಬೇಕಾಗುವಷ್ಟು.

ಮೊದಲು ಬಾಣಲಿಯಲ್ಲಿ ತುಪ್ಪ ಅಥವಾ ಎಣ್ಣೆಯಲ್ಲಿ ಒಗ್ಗರಣೆ ತಯಾರಿಸಿ. ತಯಾರಾದ ಒಗ್ಗರಣೆಗೆ ತುರಿದ ಟೋಮಾಟೊ ಸೇರಿಸಿ. ಟೋಮಾಟೊ ಹದವಾಗುವಷ್ಟು ಫ್ರೈ ಮಾಡಿ. ಒಂದು ತಟ್ಟೆಯಲ್ಲಿ ಮೊಸರು ಮತ್ತು ಅದಕ್ಕೆ ಬೇಕಾಗುವಷ್ಟು ಉಪ್ಪು ಸೇರಿಸಿಡಿ. ನಂತರ ಬಾಣಲಿಯಲ್ಲಿನ ಮಿಶ್ರಣವನ್ನು ಮೊಸರಿನ ತಟ್ಟೆಗೆ ಸೇರಿಸಿ ಚೆನ್ನಾಗಿ ಕಲಸಿ. ರುಚಿಯಾದ ತಂಬೂಳಿ  ತಯಾರು! ನಂತರ ಅನ್ನದೊಂದಿಗಿ ಕಲಸಿ ಆನಂದಿಸಿ :-)

ಟೋಮಾಟೊ ತಂಬೂಳಿ

ಅವಲಕ್ಕಿ ಒಗ್ಗರಣೆ

ಇಂದಿನ ತಿಂಡಿ ಅವಲಕ್ಕಿ ಒಗ್ಗರಣೆ! ಸಾಮಾಗ್ರಿಗಳು ಇದ್ದರೆ 15 ನಿಮಿಷದ ಕೆಲಸ ಅಷ್ಟೇ ;). ನಾನು ತಯಾರಿಸುವ ವಿಧಾನವನ್ನು ಇಲ್ಲಿ ಬರೆದಿದ್ದೇನೆ. ಮಹಾರಾಷ್ಟ್ರದಲ್ಲಿ ಇದನ್ನು ವಿಭಿನ್ನ ರೀತಿಯಲ್ಲಿ ತಯಾರಿಸುತ್ತಾರೆ.

ಬೇಕಾಗುವ ಸಾಮಾಗ್ರಿಗಳು:

1) ದಪ್ಪ ಅವಲಕ್ಕಿ - 3/4 ಲೋಟೆ
2) ಒಗ್ಗರಣೆ ಸಾಮಾಗ್ರಿಗಳು (ಎಣ್ಣೆ, ಸಾಸಿವೆ, ಕಡಲೆ ಬೇಳೆ, ಶೇಂಗಾ, ಘಾಟಿ ಮೆಣಸು, ಕರಿಬೇವು ಸೊಪ್ಪು)
3) ಹುಣಸೆ ಹಣ್ಣಿನ ನೀರು
4) ಸ್ವಲ್ಪ ಬೆಲ್ಲ
5) ಸ್ವಲ್ಪ ತುರಿದ ತೆಂಗಿನಕಾಯಿ

ಅವಲಕ್ಕಿ ಒಗ್ಗರಣೆ

ಮೊದಲು ದಪ್ಪ ಅವಲಕ್ಕಿಯನ್ನು ತೊಳೆದು 5 ನಿಮಿಷ ನೆನೆಯಲು ಬಿಡಿ. ನಂತರ ನೀರನ್ನು ಚೆಲ್ಲಿ ಸೋಸಲು ಇಡಿ (ಒಣಗಲಿಕ್ಕಾಗಿ). ಇದೆ ಸಮಯದಲ್ಲಿ ಬಾಣಲಿಯಲ್ಲಿ ಒಗ್ಗರಣೆಗೆ ಇಡಿ. ತುಪ್ಪದ ಒಗ್ಗರಣೆಯಾದರೆ ರುಚಿ ವೃದ್ಧಿಸುವುದು. ಸಾಸಿವೆ, ಕಡಲೆ ಬೇಳೆ, ಶೇಂಗಾ, ಮೆಣಸು, ಕರಿಬೇವು ಸೊಪ್ಪು ಸರಿಯಾದ ಸಮಯಕ್ಕೆ ಒಗ್ಗರಣೆಗೆ ಹಾಕಿ ಬೇಕಾದಷ್ಟು ಫ್ರೈ ಮಾಡಿ. ತದನಂತರ ಹುಣಸೆ ಹಣ್ಣಿನ ನೀರನ್ನು ಒಗ್ಗರಣೆಗೆ ಹಾಕಿ. ನೀರನ್ನು ಬಿಸಿ ಒಗ್ಗರಣೆಗೆ ಹಾಕುವುದರಿಂದ ಸ್ವಲ್ಪ ಮೆಲ್ಲನೆ ಜಾಗರೂಕತೆಯಿಂದ ಹಾಕಿ. ನೀರಿನ ಮಿಶ್ರಣಕ್ಕೆ ತುಂಡು ಬೆಲ್ಲ ಸೇರಿಸಿ. ಕಡೆಗೆ ಸ್ವಲ್ಪ ಉಪ್ಪು ಹಾಗು ಚಿಟಿಕೆ ಅರಿಶಿನ ಪುಡಿ ಸೇರಿಸಿ ಕುದಿಯಲು ಬಿಡಿ. ಸಿಮ್ಮಿನಲ್ಲಿ ಕುದಿಸಿ. ನೀರಿನ ರುಚಿಯನ್ನು ಗಮನಿಸಿ ಬೇಕಾದನ್ನು ಹಾಕಿ. ನೀರು ದಪ್ಪ ದ್ರವವಾಗುವವರೆಗೆ ಕುದಿಸಿ . ತದನಂತರ ಸೋಸಿದ ಅವಲಕ್ಕಿಯನ್ನು ಬಾಣಲಿಗೆ ಸುರಿದು ಮಿಶ್ರಣವನ್ನು ಚೆನ್ನಾಗಿ ಕಲಸಿ. ನೀರು  ಆವಿಯಾದ ಮೇಲೆ ಗ್ಯಾಸ್ ಬಂದು ಮಾಡಿ. ನಂತರ ಇದಕ್ಕೆ ಸ್ವಲ್ಪ ತುರಿದ ತೆಂಗಿನಕಾಯಿ ಸೇರಿಸಿದರೆ ರುಚಿಯಾದ ತಿಂಡಿ ತಯಾರು :-).

ಅವಲಕ್ಕಿ ಒಗ್ಗರಣೆಯನ್ನು ಚಿಪ್ಸ್ ಅಥವಾ ಮಿಕ್ಷರ್ ಜೊತೆ ತಿನ್ನಬಹುದು. ಕಡೆಗೆ ಸ್ವಲ್ಪ ಮೊಸರಿನ ಜೊತೆ ತಿನ್ನಿ. ಇದಕ್ಕೆ ಪೇಪರ್ ಅವಲಕ್ಕಿ ಕೂಡ ಉಪಯೋಗಿಸಬಹುದು. ಇದನ್ನು ಉಪಯೋಗಿಸಲು ಸ್ವಲ್ಪ ಅಭ್ಯಾಸ ಇರಬೇಕು. ಇಲ್ಲವಾದಲ್ಲಿ ಮುದ್ದೆಯಾಗಿಬಿಡುತ್ತದೆ. ಯಾಕೆಂದರೆ ಪೇಪರ್ ಅವಲಕ್ಕಿಯನ್ನು ನೀರಿನಲ್ಲಿ ತೊಳೆದ ತಕ್ಷಣವೇ ಉಪಯೋಗಿಸಬೇಕು, ನೆನೆಸಿಡಬಾರದು.ಈ ತಿಂಡಿಗೆ ಕೆಲವರು ಈರುಳ್ಳಿ ಮತ್ತು ಬಟಾಟೆಯಯನ್ನು ಕೂಡ ಉಪಯೋಗಿಸುತ್ತಾರೆ.

ಚಿತ್ರ: ನಾನು ಮಾಡಿದ ತಿಂಡಿ :-)

ನೀರು ದೋಸೆ

ಇವತ್ತು ನೀರು ದೋಸೆ ತಯಾರಾಗುತ್ತಿದೆ. ತಯಾರಿನ ಮಧ್ಯದಲ್ಲಿ ಒಂದು ಸಣ್ಣ ಬರಹ. ಕರಾವಳಿಯಲ್ಲಿ ಹೆಚ್ಚಾಗಿ ಕಂಡು ಬರುವ ದೋಸೆ ಇದು. ಇದನ್ನು ತಯಾರಿಸುವುದು ಬಹಳ ಸುಲಭ ಆದರೆ ಕಾವಲಿಯಲ್ಲಿ ಹಾಯಿಸುವುದು ಸ್ವಲ್ಪ ಕಷ್ಟ (ಮೊದಲ ಬಾರಿ ಮಾತ್ರ). ಇದನ್ನು ತಯಾರಿಸುವ ಬಗ್ಗೆ ಇಲ್ಲಿ ಬರೆದಿದ್ದೇನೆ. ಈ ದೋಸೆ ಹೆಚ್ಚಿನವರು (ನನ್ನಂತವರು) ಕನಿಷ್ಠ ೭ ರವರೆಗೆ ತಿನ್ನುತ್ತಾರೆ. ಆದರೆ ಇದು ಬೇಗ ಕರಗುವುದರಿಂದ, ಮಧ್ಯಾಹ್ನದ ವೇಳೆಗೆ ಬಹಳ ಬೇಗ ಹಸಿವಾಗುತ್ತದೆ.

ನೀರು ದೋಸೆ

ಮೊದಲು ಊಟದ ಅಕ್ಕಿಯನ್ನು ಸುಮಾರು ೫-೬ ಘಂಟೆ ನೆನೆಸಿಡಿ. ನಂತರ ಅಕ್ಕಿಯನ್ನು ರುಬ್ಬಿ. ರುಬ್ಬುವಾಗ ನೀರು ಹದವಾಗಿ ಸೇರಿಸಿ. ತುಂಬಾ ನೀರಾದರೆ ದೋಸೆ ಎಬ್ಬಿಸುವುದು ಕಷ್ಟವಾಗುವುದು. ರುಬ್ಬುವ ಮಧ್ಯದಲ್ಲಿ ಸ್ವಲ್ಪ ತುರಿದ ತೆಂಗಿನಕಾಯಿ ಸೇರಿಸಿ. ಇದು ದೋಸೆಯನ್ನು ಬಹಳ ಮೆದುವಾಗಿಸುತ್ತದೆ. ಜಾಸ್ತಿ ಹಾಕಿದರೆ ಮತ್ತೆ ದೋಸೆ ಎಬ್ಬಿಸುವುದು ಕಷ್ಟವಾಗುತ್ತದೆ. ಸುಮಾರು ೪೫ ನಿಮಿಷ ರುಬ್ಬಿದ ನಂತರ ಬೇಕಾದಷ್ಟು ನೀರು ಸೇರಿಸಿ ಜೊತೆಗೆ ರುಚಿಗೆ ತಕ್ಕ ಉಪ್ಪು ಹಾಕಿ. ಇದನ್ನು ತಕ್ಷಣವೇ ಉಪಯೋಗಿಸಬಹುದು. ನಾನ್-ಸ್ಟಿಕ್ ಕಾವಲಿ ಬಳಸಿದರೆ ಉತ್ತಮ. ದೋಸೆ ಚೆನ್ನಾಗಿ ಎಬ್ಬಿಸಲು ಬರುತ್ತದೆ. ಬ್ಯಾಚುಲರ್ ಆದ ನನಗೆ ೧ ಲೋಟೆ ಅಕ್ಕಿಯ ಮಿಶ್ರಣ ಸುಮಾರು ಮೂರು ಹೊತ್ತಿಗೆ ಸಾಕಾಗುತ್ತದೆ.

ಮಿಶ್ರಣ ತಯಾರಾದ ನಂತರ, ಕಾವಲಿ ಬಿಸಿಯಾಗುವ ತನಕ ಕಾಯಿರಿ. ಜೊತೆಗೆ ಎಣ್ಣೆಯನ್ನು ಹರಡಿ. ಸಣ್ಣಗೆ ತೆಳುವಾಗಿ ದೋಸೆ ಹಾಯಿಸಿ. ನಂತರ ಕಾವಲಿಯನ್ನು ಮುಚ್ಚಬೇಕು. ಸುಮಾರು ೨೦ ಸೆಕಂಡಿನ ನಂತರ ಮುಚ್ಚಳ ತೆಗೆದು ಮೆಲ್ಲನೆ ದೋಸೆ ತೆಗೆಯಿರಿ. ಗ್ಯಾಸ್ ನ ಬೆಂಕಿ ಸ್ವಲ್ಪ ಜಾಸ್ತಿ ಇದ್ದರೆ ಒಳ್ಳೆಯದು. ದೋಸೆಯನ್ನು ತುರಿದ ತೆಂಗಿನಕಾಯಿ ಮತ್ತು ಬೆಲ್ಲದ ಮಿಶ್ರಣದ ಜೊತೆಗೆ ತಿಂದರೆ ಬಹಳ ರುಚಿ. ಅದರ ಜೊತೆ ಮಾವಿನಹಣ್ಣು ರಸಾಯನ, ಬೆಣ್ಣೆ ಕೂಡ ಉತ್ತಮ ಕಾಂಬಿನೇಶನ್. ಕಡೆಗೆ 2 ದೋಸೆಯನ್ನು ಮೊಸರಿನೊಂದಿಗೆ ತಿನ್ನಿ. ಇದರ ಒಂದೆ ತೊಂದರೆಯೆಂದರೆ, ದೋಸೆ ಹಾಯಿಸುವಾಗ ಸುತ್ತಲೂ ಅದರ ಮಿಶ್ರಣ ಹರಡುತ್ತದೆ. ಪದೇ ಪದೇ ಕ್ಲೀನ್ ಮಾಡುವುದೇ ಕೆಲಸವಾಗುತ್ತದೆ.

ಚಿತ್ರ: ನಾನು ತಯಾರು ಮಾಡಿದ ನೀರು ದೋಸೆ :-)

ಮಳೆಗಾಲಕ್ಕೊಂದು ಕರಾವಳಿಯ ಕಷಾಯ

ಮಳೆಗಾಲವೆಂದರೆ ಕರಾವಳಿಯಲ್ಲಿ ಅನೇಕ ರೋಗಗಳ ಆಗಮನ ಕೂಡ. ರೋಗ ಅಂದರೆ ವಿಚಿತ್ರರೋಗಗಳಲ್ಲ, ಬದಲಾಗಿ ಶೀತ, ಕೆಮ್ಮು, ವಾತ, ಪಿತ್ತ ಮುಂತಾದವು. ಇದಕ್ಕೆ ಕರಾವಳಿಯವರು ಕಂಡುಕೊಂಡ ಪರಿಹಾರ ಕಾಲಕಾಲಕ್ಕೆ ಕೆಲವನ್ನು ಸೇವಿಸದೇ ಇರುವುದು. ಉದಾಹರಣೆಗೆ: ಆಷಾಡ ಮಾಸದ ಮಳೆ ಮತ್ತು ಚಳಿ ಸಮಯದಲ್ಲಿ ಮೊಸರು ಸೇವಿಸದೇ ಇರುವುದು, ಕೆಲವೊಮ್ಮೆ ಬೇಳೆ ಸೇವಿಸದೇ ಇರುವುದು ಮುಂತಾದವು. ಹಿಂದಿನ ಕಾಲದಲ್ಲಿ ಆರೋಗ್ಯವನ್ನು ಗಮನದಲ್ಲಿಟ್ಟುಕೊಂಡು ಇಂತಹ ವೃತಗಳನ್ನು ಆಚರಣೆಗೆ ತಂದಿದ್ದಾರೆ. ಮತ್ತೊಂದು ಪರಿಹಾರ ಎಂದರೆ ಮನೆಯಲ್ಲೇ ತಯಾರಿಸಿದ ಕೊತ್ತಂಬರಿ-ಜೀರಿಗೆ ಕಷಾಯ. ಇದು ದೇಹವನ್ನು ತಂಪಾಗಿಡುತ್ತಲ್ಲದೇ, ಶೀತ-ಕೆಮ್ಮಿನಿಂದಲೂ ದೂರವಿಡುತ್ತದೆ. ಕರಾವಳಿಯ ಹಳ್ಳಿಗಳಲ್ಲಿ ಮಾತ್ರವಲ್ಲ ಬದಲಾಗಿ ನಗರ ಪ್ರದೇಶಗಳಾದ ಉಡುಪಿ, ಮಂಗಳೂರಿನಲ್ಲೂ ಹಲವರು ಈ ಕಷಾಯ ಸಿದ್ಧಪಡಿಸುತ್ತಾರೆ. ಈ ಕಷಾಯ ಪುಡಿಯನ್ನು ಮಾಡುವುದು ಬಹು ಸುಲಭ

ಬೇಕಾಗುವ ಸಾಮಾಗ್ರಿಗಳು:
೧) ಕೊತ್ತಂಬರಿ - ೧ ಲೋಟೆ
೨) ಜೀರಿಗೆ - ಅರ್ಧ ಲೋಟೆ
೩) ಬಡಸೊಪ್ಪು - ಕಾಲು ಲೋಟೆ
೪) ಮೆಂತೆ - ಸ್ವಲ್ಪ ಸಾಕು (೧/೧೦ ಲೋಟೆ)
೫) ಕರಿಮೆಣಸು - ಸ್ವಲ್ಪ ಸಾಕು (೧/೧೦ ಲೋಟೆ). ಖಾರ ಹೆಚ್ಚು ಬೇಕಾದರೆ ಸ್ವಲ್ಪ ಹೆಚ್ಚಿಗೆ ಹಾಕಬಹುದು.

ಮಾಡುವ ವಿಧಾನ:
ಮೊದಲು ಮಿಶ್ರಣವನ್ನು ಬಾಣಲಿಯಲ್ಲಿ ಹಾಕಿ, ಸ್ವಲ್ಪ ಹೊತ್ತು ಬಿಸಿ ಮಾಡಬೇಕು. ಮಿಶ್ರಣ ಕಪ್ಪಾಗದಂತೆ ನೋಡಿಕೊಳ್ಳಬೇಕು. ಸ್ವಲ್ಪ ಬಿಸಿ ಮಾಡಿದರೆ ಸಾಕು. ನಂತರ ಮಿಶ್ರಣವನ್ನು ಮಿಕ್ಸಿಯಲ್ಲಿ ಹಾಕಿ ಸಣ್ಣಗೆ ಪುಡಿ ಮಾಡಬೇಕು. ಇಷ್ಟು ಮಾಡಿದರೆ ಕಷಾಯ ಪುಡಿ ತಯಾರು.

ಕಷಾಯ ಮಾಡುವ ವಿಧಾನ:
ಮೊದಲು ತಟ್ಟೆಯಲ್ಲಿ ಒಂದು ಲೋಟೆ ನೀರಿಗೆ ಒಂದು ಚಮಚ ಕಷಾಯ ಪುಡಿ ಹಾಕಿ ಕುದಿಸಬೇಕು. ಹೆಚ್ಚು ಕುದಿಸಿದರೆ ಕಷಾಯ ಹೆಚ್ಚು ಕಡಕ್ ಆಗುತ್ತದೆ. ಸ್ವಲ್ಪ ಹೆಚ್ಚು ಕುದಿಸಿದರೆ ಒಳ್ಳೆಯದು. ಕುದಿದ ನೀರನ್ನು ಸೋಸಿ ಹಾಗೆಯೇ ಕಷಾಯದ ನೀರನ್ನು ಕುಡಿಯಬಹುದು. ಇಲ್ಲವೇ ಸ್ವಲ್ಪ ನೀರು ಹಾಲಿಗೆ ಕಷಾಯದ ನೀರನ್ನು ಬೆರೆಸಿ ಕುಡಿಯಬಹುದು. ಬೇಕಾದರೆ ಸ್ವಲ್ಪ ಸಕ್ಕರೆ ಹಾಕಿಕೊಳ್ಳಿ. ಮಳೆ ನೋಡುತ್ತಾ ಈ ಕಷಾಯವನ್ನು ಸವಿಯುವುದೇ ಆನಂದ. ದಿನಕ್ಕೆ ಎರಡು ಬಾರಿ ಕಾಫಿ-ಚಹಾ ಬದಲು ಕಷಾಯವನ್ನು ಕುಡಿದರೆ ಆರೋಗ್ಯಕ್ಕೂ ಒಳ್ಳೆಯದು. ಈ ಕಷಾಯ ಮಳೆಗಾಲಕ್ಕೆಂದೇ ಮಾಡಿದರೂ ಇದು ಯಾವ ಕಾಲಕ್ಕೂ ಅನುಕೂಲಕ್ಕೆ ಬರುತ್ತದೆ.